26 Talosaga a ‘Abdu’l-Baha (#16078)

A Ia ko te Atua.

O ko koe tela e tamilomilo i te ofo i te Kogaa-Koga Fakalavea ne faka pukupuku gina iei ne Lukuuga mai i luga!  Sisi ou lima ki luga ite fakafetai ite Malumalu ote Atua tonu tokotasi, kae fai atu: O Koe kote fakamoemoega tafasili ite maluga o so se tino alofa fakatuanaki!  O Koe kote Takitaki-ala o so se agaaga ola e takaseasea! A Koe ne faka-akoi gina ate tavini vaaivai tenei ki Au fakamanuiaaga seai se gataaga, kae takitaki atu a ia ko seai se aoga kae malalo ki luga ite Mataloa o Tou tafatasi.  Ko oti ne apai aka ne Koe ki laugutu maloo konei ate vaiola o Tou alofa-kaimalie, kae e toe fakaola gina ate agaaga ola fitaa kae vaaivai tenei ne te matagi ili malielie ote alofa-fakamagalo faka-te-lagi.  Au e moli atu ate fakafetai aua ko oti ne fakaeke mai ki luga ia au a se vaega kaatoa mai i Ou alofaaga tafasili ite lei e toe fakallakei mai au mote faka-aloalo ke oko atu au ki Tou Mataloa mana.  E akai totuli atu au ki se vaega e seai se gataaga mai i fakamanuiiaga uke o Tou Maalo mai i luga.  Tuku mai a Tou feasoasoani.  Fakaeke mai Ou alofaaga lei.

-`Abdu'l-Bahá
-----------------------

26 Talosaga a ‘Abdu’l-Baha (#16079)

O ko Koe kote Taugasoa e se-lavea! O kote Manakoga o mea katoa ite lalolagi tenei mote lalolagi ma vau! O Koe kote Fagasele alofa atafai!  A agaaga ola konei e seai ne olotou fakamoemoeega kae ko miti gia ne Tou alofa, ka ko latou kola vaaivai e saala atu kise maluuga i Tou Malumalu.  I po katoa e pusi kae golo a olotou manavaaga ite olotou mao mai mo Koe, kae i fakataeao katoa e fanoanoa kae tagi a latou ona kote fakasauaa a tino loto masei.  A latou e pokotia i taimi katoa i fakalavelave fou, kae ko fitaa foki i tofotofooga i taimi takitasi e manava a latou mai i te sauaa o tino teke kae fai taua.  Tavaegia a Koe tela, e uiloa ate feitu tenei, a latou ko ula pela mote temupolo ote afi e maina malifalifa pela mote laa mote masina.  A latou e tu maluga, pela mo fuka e tuu i luga, ite Fakatokaaga a te Atua, ka fakavave atu, pela mo tino toa i luga i solofanua, ki loto ite malae.  A latou ko mataala pela mene pula lakau manogi gali kae e fonufonu i te lifu pela mo kataaga ate pula losa.    Tela la, O Koe kote Fakasoasoa alofa, feasoasoani alofa ki agaaga ola konei mai i Tou alofa kaimalie faka-te-lagi tela ne tuku mai i Tou Maalo Faka-te-Lagi, kae fakasaoloto a tino fakamanuia gina konei ke mafai o fakaasi mai ia latou a failoga ote Toe Tafasili i te Maluga.

-`Abdu'l-Bahá
-----------------------

26 Talosaga a ‘Abdu’l-Baha (#16080)

O Koe kote Aliki alofa kae e seai se fakatusa!  E uiloa e se lava a te mafai mote iloa, kae e faigata kii loa o teke atu a fakalavelave, kae e tiga loa a te mafai mote iloa ne mea-alofa ne aumai ia Koe.  O te Aliki! Aumai kia matou a te mafai kae fai a matou ke iloagia, kote mea ke mafai ne matou o fakaasi atu ate toe mautakitaki maalosi, fakaseai a te lalolagi tenei mo tino katoa iei, faka ka ate afi o Tou alofa, pela loa mo moli gako, e ka mainaina mo se ulaaga e avatu iei ate omotou malifalifa ki tua atu.  
O te Aliki ote Maalo Faka-te-Lagi!  Fakasao mai matou mai ite lalolagi tenei o moemitiiga e seai ne aoga, kae takitaki atu matou ki kogaa mea e seai se gata mai.   Fakamae mai matou kote mea ke saoloto katoatoa a matou mai ite olaaga tuai tenei, kae fai aka matou ke fakamanuia gina mai i mea-alofa mataefa ote Maalo Faka-te-Lagi. Fakasaoloto mai matou ite lalolagi tenei o te seai lele loa tela se ata o te mea tonu, kae aumai ki luga ia matou ate ola e se gata mai.  Fakaeke mai kia matou ate lifu mote fiafia, mo alofaaga kia matou mote lotolei mote lotomalie.  Faka-mafanafana a omotou loto, kae aumai ate filemu mote tokaaga malie ki omotou agaaga ola, kote mea i taimi e avaka iei matou ki Tou Maalo Faka-te-Lagi e mafai ne matou o maua a Tou nofomai kae fiafia i lalolagi mai luga.  A Koe kote Foai, kote Fakaeke, kote Mafi Katoatoa!

-`Abdu'l-Bahá
-----------------------

26 Talosaga a ‘Abdu’l-Baha (#16081)

O toku Fagasele kite se gata mai mo toku Taugasoa fakapelepele!  E pefea ate leva o toku nofo e seai a Tou nofo-pili mai kae pokotia masei kii loa ona ko te mao mai ia Koe?  Ki kogaa koga manava o Tou Maalo Faka-te-lagi taki atu au, kae ite ata-lavea o te saeega mai o Tou Nofoaiga mai i te lagi pei mai ki luga ia au a te kiloga o Tou alofa-kaimalie.  

O Koe kote Aliki Maluga!  Lau atu au i loto i tino ote Maalo Faka-te-Lagi!  A te lalolagi e se tumau tenei ko toku koga nofo; fakasaoloto mai au ke nofo i lalolagi e Seai-se-Koga Tumau o latou.  Kite lalolagi ote kogaa laukele tenei e nofo iei au; tuku mai ki luga ia au a te malifalifa o Tou mainaaga matagofie.   I te lalolagi tenei ote pefu e nofo iei au; fai aka au pela me e nofo ite falepuipui o Tou lalolagi faka-te-lagi, kote mea ke mafai ne au o tuku ifo a toku ola i Tou auala kae ke fakataunu ate manakoga o toku loto, ke kalauna a toku ulu kite fou o alofaaga faka-te-lagi kae avaka ate tagi manumaalo penei “O te Matagofie o te Atua, kote Toe Tafasili i te Matagofie!”

-`Abdu'l-Bahá
-----------------------

26 Talosaga a ‘Abdu’l-Baha (#16082)

O ko Koe kote Aliki alofa!  A agaaga ola konei ko Ou taugasoa kola ko maopoopo fakatasi kae ko mitigia ne Tou alofa. A latou ko fonu ite fiafia mai i vae maina o Tou gali kae ko ofo ite manogi sausau o kaufiliiga o laulu o Koe.   Ko oti ne tuku katoatoa atu olotou loto kia Koe kae, malalo mote vaaivai, ko sasale i Tou auala.  Ko oti ne liakina a olotou taugasoa pela foki mo tino kese kae ko piki mau ki Tou tafatasi, kae ifo atu mote faka-aloalo mai i mua o Koe.

Latou e kau ite lalolagi tuai tenei; ne faka fetauigia a latou ne Koe ki Tou Malo Faka-te-Lagi.  Latou pela mene lakau ola lau mate mate ite toga vao o te se-lava mote liakina; ne fai ne Koe a latou pela mene uli ote fatoaaga ote poto mote malamalama.  A leo konei ne se fakalogoaa; kae ne fai ne Koe a latou ke faipati.  A latou ne loto vaaivai; kae ne tuku atu ne Koe kia latou a te faka-mainaaga.  A latou pela mo laukele maaloo kae e tu-lavaki; kae ne fuli ne Koe a latou ki se fatoaaga losa mo uiga e gaalo i loto.  Latou pela mo tamaliki ote lalolagi o tino katoa; kae ne faka-mafai ne Koe a latou ke maua ne latou ate matua faka-te-lagi.

O Koe kote Tokotasi Alofa! Talia a latou ki se fale e fakaafe kae se lafiiga i loto ite tokaaga o Tau puipuiiga, kae puipui a latou mai i tofotofooga mo iloiloga.  Avatu kia latou a Tau fesoasoani e se-lavea, kae fakaeke atu kia latou a Tou alofa agalelei e sao mai i te se.

O ko Koe kote Aliki alofa mote fagasele!  A latou kote foitino, a ko Koe kote Agaaga ote ola.  Ate foitino e fakana ki luga i te foou mote gali o te alofa agalelei o te agaaga.  Tela la, e tu latou, o manako ki Tau fakamaoniiga kae nau kite maalosi tumau o te Agaaga Tapu i loto i te Fakaasiga fou tenei.  A Koe kote Mafi.  A Koe kote Foai, kote Fakasoasoa, mote Fakamagalo.  A Koe kote Tokotasi Tela e sulu maina mai i te Lalolagi-e-Se-lavea.

-`Abdu'l-Bahá
-----------------------

26 Talosaga a ‘Abdu’l-Baha (#16083)

O ko Koe Kilo Mao mote Atamai Faka-te-lagi!  Faigata fakanumi ko sae aka ka ko fakalavelave e tu mai o pono ko sae aka foki.  O te Aliki!  Ave keatea a faigata konei kae fakaasi atu a fakamaoniiga o Tou mafi mote maalosi.  Faka mama ate nofo mativa konei kae fakatoka ate ala o latou ite auala tafasili ite faigata.  O ko Koe Kilo Mao mote Atamai Faka-te-lagi!  A fakalavelave konei e tu mai o pono e feniuiaki mo niisi fakalavelave aka e se maua o lau.  E seai aka foki se feasoasoani na ko Koe, kae e seai aka foki se lago na loa ko Koe.  A motou fakamoemoega katoa ko oti ne tuku ki luga ia Koe, kae lisaina a motou nofonofooga ki Tau puipuiiga.  A Koe kote Takitaki-ala mote Ave-Keatea a so se fakalavelave, ka ko Koe kote Atamai, kote Lavea, mote Lagona.

-`Abdu'l-Bahá
-----------------------

26 Talosaga a ‘Abdu’l-Baha (#16084)

O te Atua o te Alofa Fakamagalo!  O Koe kote Tafasili ite Maluga Tokotasi!   Au e seai kae se tavini vaaivai, seai se maalosi kae aunoa se feasoasoani, kae ko au ko oti ne atiake i loto ite fale o Tou alofa agalelei mo Ou alofaaga, fagai mai i te fatafata o Tou alofa fakamagalo, kae akoako mai i te manava o Tou alofa-kaimalie.  O te Aliki!  E uiloa au e mativa kae oge mea, so se tino e mativa ko fai a ia ke maumea auala atu i Tou maukoloa mataefa, a ko so se tino maumea, kafai e seai ia ia Ou alofaaga, e tonu e mativa kae tuku liakina.   

O ko Koe Kilo Mao mote Atamai Faka-te-lagi!  Tuku mai kia au ate maalosi o kolomaki ate amoga mafa tenei, kae fai aka ke mafai ne au o leoleo a te faka-ekeega tafasili i te maluga tenei, aua ite masei o te faitaua mai i tofotofooga e mafai iei ne mauga o malepelepe ki pefu, ka kote tumu maluga loa e malepe kite seai.   E iloa katoatoa ne Koe i toku loto e seai aka foki e sala ne au vagana ko Tou masausauaga, kae i toku agaaga ola e manako au kite seai aka na loa ko Tou alofa.  Tausi aka au ki luga ke tavini ki Au fagasele, kae talia mai ke nofo kite se gata mai o tavini ite mataloa o Tou Malumalu.  A Koe kote Alofa.  A Koe kote Aliki o alofaaga matalasi.

-`Abdu'l-Bahá
-----------------------

26 Talosaga a ‘Abdu’l-Baha (#16085)

O ko Koe Kilo Mao mote Atamai Faka-te-lagi!  Fago aka au kae fai a toku mafaufau ke ala.  Fai aka au ke se fakapiki ki so se mea na loa ko Koe, kae fakaofoofo gina au ne te alofa o Tou gali.  Agi mai i luga ia au ate manavaaga o te Agaaga Tapu, kae fai aka ko au ke lagona ne au a te kalaga ate Malo Faka-te-Lagi o Abhá. Fakaeke mai kia au ate maalosi faka-te-lagi, kae faka ka ate lamepa ote agaaga i loto ite potu tafa ki loto o toku fatu.  Liakina mai au i so se fakanofooga, kae fakasao mai au i so se kopikopiaga kote mea ke mafai ne au o fiafia kite seai aka foki na loa ko Tou fiafiaaga-lei, sala kite seai aka foki na loa ko Ou mata, kae se sasale i se auala aka na loa ko Tou auala. Talia mai ko au ke mafai o fai a latou se fakalogo ke masala i olotou mafaufau ka ko tino moe ke ala, kote mea ke fakaoko atu ate vai o te ola kia latou kola e fia inu kii kae aumai ate fakalei o masaki faka-te-lagi kia latou kola e masaki kae paakia.

E ui iei au e malalo, faka-alofa kae mativa, a ko Koe ko toku afeega mo toku lafiiga, toku lago mo toku feasoasoani.  Tuku ifo ki lalo a Tou feasoasoani i se auala atamai ko tino katoa ke ofo.  O te Atua!  A Koe, e tonu, kote Mafi-Katoatoa, kote Tafasili i te Maalosi, kote Lavea-Katoatoa.

-`Abdu'l-Bahá
-----------------------

26 Talosaga a ‘Abdu’l-Baha (#16086)

A Ia kote Atua.

O te Atua, toku Atua!  Ko oti ne kilo mau atu oku mata kia Koe, kae akai fakamolemole atu ke ligi ifo a te vasa o Tau fakagata masaki.  Feasoasoani alofa mai kia au, O te Aliki, ke tavini atu Au ki tino kae ke fakagata masaki o Au tavini.  Kafai e fesoasoani a Koe mai kia au, a te auala fakalei masaki e tuku atu ne au e fai mo vailakau fakagata masaki mo so se tulaga masaki, a se alaaga ea ote vai ola mo so se tino ko mate i te fia inu, kae se lima mafanafana mo so se loto naunau.  Kafai e se feasoasoani mai a Koe, e seai aka foki na loa kote faka-masakisaki, kae ko se maua ne au o aumai ate fakaleiiga o masaki ki so se agaaga ola.

O te Atua, toku Atua!  Feasoasoani mai au auala mai i Tou maalosi o fakalei a masaki.  A Koe, e tonu, kote Fakalei-o-Masaki, kote Lava-loa-ia-Ia, ko Ia Tela kote ave keatea o so se mae mo so se masaki, ko Ia Tela ei ai ate puleega i luga i mea katoa.
	.

-`Abdu'l-Bahá
-----------------------

26 Talosaga a ‘Abdu’l-Baha (#16087)

O te Aliki!  Aumai kia au a se tusaga o Tou alofa agalelei mote alofa-kaimalie, Tou atafai mote puipuiiga, Tou fale malu mote alofa matalasi, ko oku aso fakaoti ke mafai o fakalavea gia mai i luga atu o te kamataga, ka ko aso fakaoti o toku ola ke mafai o tala atu ki Ou fakamanuiaaga e se mafai o lau.  Ke mafai a Tou alofa-kaimalie mote alofa matalasi o fanaifo ki luga ia au i so se taimi, ka ko Tau fakamagalo mo Tou alofa fakamagalo ke auala atu i manavaaga katoa, ke oko ki taimi, mai i lalo ote ata malu malu o Tou Tulaga fakamaluga, kote mea ko au ke mafai o malolo atu kite Malo Faka-te-Lagi o te Tavaegia-Katoatoa.  Ko Koe kote Fakaeke mote Alofa-Tumau, a ko Koe, e tonu, kote Aliki ote alofa agalelei mote matalasi.

-`Abdu'l-Bahá
-----------------------

26 Talosaga a ‘Abdu’l-Baha (#16088)

O ko Koe kote Fakasoasoa, O ko Koe kote Fakamagalo! A te agaaga ola faka-aliki ko oti ne fanatu ki luga ite Maalo Faka-te-Lagi ote tina mea tonu, kae fakavavave atu mai ite lalolagi e se tumau ote pefu kite lalolagi matagofie e seai se gataaga.  Fakamaluga ate tulaga ote tino kami tenei ne toe oko mai, kae fakapei atu kite tavini lauiloa tenei a se gatu fou kae fakaofoofogina. 

O te Aliki e Seai-se-Fakatusa!  Avatu a Tau fakamagalooga mote atafai kote agaaga ola tenei ke mafai o ulufale atu ki loto i kogaa koga malolo o Au mea lilo kae ke mafai a ia o fai pela me se taugasoa pilimai i loto i te lukuuga o matagofie taulekaleka.  Ko Koe kote Foai, kote Fakaeke, kote Alofa Tu-tumau.  Ko Koe kote Fakamagalo, kote Atafai, kote Tafasili i te Maalosi.

-`Abdu'l-Bahá
-----------------------

26 Talosaga a ‘Abdu’l-Baha (#16089)

A Ia kote Aliki.

O ko Koe kote Aliki fakamagalo!  A tavini konei ne agaaga ola, ka ko olotou loto fiafia ne fakamaina kae malifalifa mai ite mainaaga o Tau takitakiiga.  Ne inu ne latou ate ipu uaina e fonu sofi sofi ki tua mai i Tou alofa, kae tuku atu olotou taliga ki Au mea lilo e seai se gataaga mai ite sikuleo o Tou poto.  Ne sai a olotou loto kia Koe, kae motu saoloto mai ite uka sai o te loto se-lei, kae taofi mau ki Tou tafatasi.  Fai aka a agaaga ola taaua konei pela mene taugasoa o latou nofo sala ite Lagi, kae faulu atu a latou kite lukuuga faka-pukupuku o Au tino filifiligia.  Fai aka latou pela mene tino sala o Au mea funa i kogaa koga malolo mai i luga, kae ufi atu latou i loto ite tai o moli maina.  A Koe kote Fakaeke, kote Mainaina, mote Alofa.

-`Abdu'l-Bahá
-----------------------

26 Talosaga a ‘Abdu’l-Baha (#16090)

O ko Koe Kilo Mao mote Atamai Faka-te-lagi!  Ufi ifo a te tamana mote matua ote tavini tenei i Tou Malumalu ite vasa o Tau fakamagalo, kae kave keatea kae faka piua a latou mai i so se agasala mote se-fakalogo.  Talia kia latou a Tau fakamagalo mote alofa fakaseai-o-agasala, kae fakaeke atu kia latou a Tau fakaseai-o-sala agalelei.  A Koe, e tonu, kote Fakaseai-o sala, kote Fakamagalo Tu-Tumau, kote Fakaeke ote alofa tafasili ite lauefa.    E uiloa matou ne tino agasala, ka ko motou fakamoemoeega e piki mau ki luga i Tau feagaiiga mo Tau muna talitonu.  E uiloa a matou e siomia nete pogisa ote mea se, ka ko matou ko oti i taimi katoa ne fuli atu a motou mata kite faka-taeao o Au alofaaga mataefa.  Fakamasino mai matou kite mea e tau ki Tou Malumalu, kae tuku mai ki luga ia matou a te mea tela e nofooga malie ki Tou Fale Fono.  A Koe kote Fakamagalo Tumau, kote Fakaseai o sala, a Ia Tela e kilo faka seai a so se vaaivaiiga.

-`Abdu'l-Bahá
-----------------------

26 Talosaga a ‘Abdu’l-Baha (#16091)

O Koe kote Aliki alofa! Fakapiua aka a toku loto mai i kopikopiaaga katoa, kae fakafiafia a toku agaaga ola ki muna ote fiafia.  Fakamaa mai au i kopikopiaaga ki se taugasoa pela foki me se tino kese, kae faka fonufonu au i Tou alofa, kote mea ke saga katoatoa atu au kia Koe kae fakafonu au i te tumu o te fiafia; kote mea ke se manako au ki se isi mea aka na ko Koe, e se sala ki se isi tino aka na ko Koe, e se sasale i se isi auala aka na kote auala i Ou tafa, kae sautala fua mo Koe; kote mea ke mafai ne au, pela loa mote nainitigikale, e ootia kii ne Tou alofa, i ao mo po, e manava kae gulu kae fanoanoa kae tagi atu ki luga penei, “Yá Bahá’u’l-Abhá!”

-`Abdu'l-Bahá
-----------------------

26 Talosaga a ‘Abdu’l-Baha (#16092)

O te Aliki! Mafaga ligiiga ote alofa-maumea ko oti ne tuku mai ne Koe, kae mafaga a te lolo ote alofa agalelei tenei e tafe ko oti ne tuku mai ne Koe!  Ko oti ne fai ne Koe a loto katoa ke fusi tasi pela mese loto e tasi, ka ko agaaga ola katoa ke fusi tasi pela me se agaaga ola e tasi.   Ne fakaeke ne Koe ki luga i foitino e seai se-maalosi konei ate ola mote lagona, kae avatu ki luga i foitino e seai ne ola a te mafaufau o te agaaga.  Auala atu i kavei malifalifa e avatu gia  mai i te Fetu-Ao o te Alofa Fakamagalo Katoatoa, ne fakaaoga ne Koe a atomu konei ote pefu ke mafai o lavea gia, kae auala atu i kaumana potopoto o te vasa o te tafatasi, ne faka-mafai ne Koe  ko motiiga se-tumau konei ke olo aka o pa-fuaefa kae tagi pagulu.  
O Koe kote Tokotasi Mafi Katoatoa Tela e fakaeke a se lau mouku mote mafi o se mauga kae fai ke mafai a se pefuuga e tasi ke fakaasi atu a te matagofie ote malifalifa ote laa!  Talia mai kia matou a Tou alofa agalelei mo alofaaga, kote mea ke mafai ne matou o tu ki luga o tavini a Tau Fakatokaaga kae ke se pokipoki matou mai i mua o tino ote lalolagi.

-`Abdu'l-Bahá
-----------------------

26 Talosaga a ‘Abdu’l-Baha (#16093)

O Koe kote Aliki Tafasili ite Maluga!  A matou e kumi katoa i loto i te mafi o Tou maalosi.  A Koe kote omotou Lagolago mote motou Feasoasoani.  Tuku mai kia matou a Tou alofa atafai, fakaeke mai ki luga ia matou a Tou alofa mataefa, tala aka a mataloa ote alofa agalelei, kae kilo mai ki luga ia matou a se kiloga o Ou alofaaga. Talia mai a laumatagi fakamaalosi foitino ke agi mai i luga ia matou, kae fakavave atu ne Koe a motou loto naunau.   Fakamaina a motou mata kae fai aka a se lafitaga i motou loto me kote mea ke loto masei kiei a so se maluuga galikese.  Fakafiafia a so se agaaga ola kae fakalifu a so se agaaga.  Fakaasi mai a Tou maalosi mai i te favavau kae fai ke lavea a Tou mafi takutakua.  Fai gia a manu eva ote agaaga ola o tagata ke lele ki koga maluga foou, kae faigia ko Ou taugasoa ite lalolagi tuai tenei ke fuafua a mea funa o Tou Maalo Faka-te-Lagi.  Fakamau a motou kalafaga kae fakaeke mai ki luga ia matou a loto e mautakitaki.  A matou ne tino agasala, kae ko Koe kote Fakamagalo Tu-Tumau.  A matou ko Au tavini, a ko Koe kote Tupu o Aliki.  A matou ne tino takaseasea e seai ne fale nofo, a ko Koe kote motou lafiiga mote lafitaga.  Lago mai kia matou mo Tou alofa agalelei kae feasosoani mai kia matou ke fakamatala atu a Ou manogi suamalie kae ke fakamaluga a Tau Muna.  Fakamaluga aka a te tulaga o latou kola faka-alofa ko seai ne koga mo olotou nofo, kae fakaeke mai a Tou maumea e seai se gataaga ki luga ia latou faka-alofa.  Tuku mai a Tou maalosi kia latou e se maalosi, kae fakaeke mai a maalosiiga faka-te-lagi ki luga ia latou ko la e vaaivai.  A Koe kote Fakasoasoa, ko Koe kote Alofa Agalelei, ko Koe kote Aliki Tela e pule i luga i mea katoa.

-`Abdu'l-Bahá
-----------------------

26 Talosaga a ‘Abdu’l-Baha (#16094)

A Ia kote Tafasili ite Mana, kote Tafasili ite Matagofie.

I te igoa ote Atua, kote Alofa Atafai, kote Alofa Fakamagalo!  Tavaeega kite Atua, kote Aliki o lalolagi katoa! 

O te Aliki toku Atua, toku Afeega mo tokiu Lafiiga!  E mafai pefea ne au o takutaku a Koe i se tulaga tela e ttau, e ui iei mo muna tafasili ite matagofie io me ko kupu tavae tafasili i te apo kae logomalie, O ko Koe kote Tafasili ite Mafi Katoatoa mote Tokotasi Fakamagalo, e atafia ne au ite laulaufaiva o so se tino e apo kae logomalie ite faipati e mafai o tuku taumate, kae ko so se tavaeega fakaasi mai ite pene a se tino io me kote laulaufaiva e numi i tena taumafaiiga o vikia fakaaloalo a se tasi o failoga o Tou maalosi tafasili ite maluga io me o fakamaluga ate Muna e tasi tela ko oti ne faiite mai ne Koe.   E tonu, a kapakau o manu eva o mafaufau o tagata ko maofa ite olotou taumafai o lele ki luga i te ea o Tou mana faka-te-lagi, ako sipaita o fakatauuga e seai ne aoga e seai se maalosi o fenuiaki a olotou fale leveleve vaaivai i luga o tumu tafasili i te maluga ote fale o Tou poto.  E seai aka se auala mo aku, na fua kote talia a toku seai lele se maalosi mo aku tatooga, kae e seai se koga mo oku nofo na fua kote pokooga ote mativa mote faigata.  E tonu, ate seai lele loa se maalosi o maina ia Koe kote kano loto tonu o te malamalama, kote fakaasi tonu o tatooga kote auala fua e maua iei a Tou nofo pili mai, ka kote fakaasi tonu o te mativa kote kamataga o te maumea tonu tena.  

   O te Aliki!  Feasoasoani mai kia au mo Au tavini fakamaoni ite motou galuega ki Tou Malumalu maluga, fakamaalosi mai matou i motou talosaga ki Tou mana faka-te-lagi, kae fai aka ke mafaufau ne matou ke malalo kae usiusitai katoatoa mai i tafa ote mataloa o Tou tafatasi.  Fakamakeke a motou kalafaga i Tou auala, o toku Aliki, ke fakamaina a toku loto ki kavei mainaina e sulu mai ite lagi o Au mea funa.   Fakafoou a toku agaaga ite laumatagi fakamaalosi foitino e agi mai ite palataiso o Tau fakaseai o sala mote fakamagalo, kae fakafiafia a toku agaaga ola mai i manavaaga fou e vau malielie mai i te laueleele o Tou mana.  Fakamaina a oku mata mai i luga atu ote sikulagi o Tou tafatasi, kae fakasaoloto mai au ke lau pela me se tasi o Au tavini fakamaoni kae ke lau fakatasi mo Au tino lagolago kola e tu makeke kae fakatuanaki.

-`Abdu'l-Bahá
-----------------------

26 Talosaga a ‘Abdu’l-Baha (#16095)

O te Aliki, kote motou Atua!  Matou e seai se feasoasoani.  A Koe kote Aliki ote kaaleva mote maalosi.  Matou e seai ne aoga; a ko Koe kote Mafi Katoatoa, kote Matagofie Katoatoa.  Matou e mativa, a ko Koe kote Fakasoasoa Katoatoa, kote Tafasili ite Kaimalie.  Feasoasoani alofa mai kia matou ite galuega ki Tou Malumalu mana, kae lago mai matou, mai i Tou alofa fakamagalo maalosi, o tapuaki kia Koe i kogaa koga tapuaki o Ou tavaeega.  Fai aka ke mafai ne matou o talai atu a Ou manogi gali i vasia o Au mea ola faiite, kae fakamaalosi mai a motou foitino o tavini kia Koe i vasia o Au tavini, kote mea ke mafai ne matou o takitaki a maalo katoa ki Tou Igoa Tafasili ite Takutakua kae taki atu a tino katoa ki matafaga ote vasa matagofie o Tou tafatasi.

O te Aliki!  Fakasao mai matou mai i kopikopiaaga ote lalolagi mo ona tino, mai i mea se o taimi ko teka atu, pela foki mo fakalavelave e seki oko mai, kote mea ke mafai ne matou o tu ki luga o fakamaluga a Tena Muna i te fiafia mote lifu tafasili kae fakamanatu Ou tavaeega ite ao mote po, ke mafaufau ne matou o kami a tino katoa kite auala ote takitakiiga kae akoako atu a latou ke tautali ki te amio lei, kote mea ke mafai ne matou o lagi a kupu o Tou tafatasi i vasia o Tau foafoaaga katoa.  E maalosi Koe o fai ate mea e faifia Koe kiei.  A Koe, e tonu, kote Mafi Katoatoa, kote Tafasili ite Maalosi.

-`Abdu'l-Bahá
-----------------------

26 Talosaga a ‘Abdu’l-Baha (#16096)

A Ia kote Atua.

O ko Koe kote alofa mote Aliki fagasele!  A taugasoa konei ko fonufonu ite fiafia mote uaina o te Feagaiiga kae ne tino e takaseasea ite togaa vao o Tou alofa.  A olotou fatu ko kaigia ne ulaaga ote mao mai ia Koe, kae nau nau kite fakaasiiga o Tou gali kese.  Mai i te Maalo Faka-te-Lagi e se-lavea, ate Lalolagi ote se-lavea, fakaasi mai kia latou a te matagofie malifalifa mo Tou alofa agalelei, kae ligi mai ki luga ia latou a te faifia lasi o Tou alofa maumea.  I so se taimi toetoe, tuku mai a se fakamanuiaaga foou kae fakaasi mai a se alofaaga e kese.

O te Kilo Mao Atamai Faka-te-Lagi!  Matou e seai se-maalosi ako Koe kote Tafasili ite Maalosi.  Matou pela mene loo foliki ako Koe kote Tupu ote Lalolagi ote Matagofie.  Fakaeke mai a Tou alofa agalelei kae fakasafe mai a Ou manuia matea ki luga ia matou, kote mea ke mafai ne matou o fakaka a se ulaaga kae tufa atu a te gali kese ki tua atu, kote mea ke mafai o fakaasi atu ate maalosi kae tavini atu kite galuega.  Tuku mai kote mea ke mafai ne matou o aumai a te fakamainaaga kite lalolagi pogisa tenei pela foki mote faka-te-agaaga ote lalolagi o te pefu e se-tumau.  Fakamae mai matou ke se seai se malolo i se taimi toetoe ia matou, io me o fakamatala a matou mo mea e se tumau ite olaaga nei.  Fai aka ke mafai a matou o fakatoka a se kaaiga lasi o te takitakiiga, ta-tau aka i omotou toto-ola a kupu o te alofa, kae liakina atu ate mataku mote fakamataku, kae fai pela mene lakau ola e isi ne fuataga, kae fai aka a  uiga tonu o tagata ke sae aka i te lalolagi e se tumau tenei.  A Koe, e tonu, kote Maumea-Lauefa Katoatoa, kote Tafasili ite Alofa-Atafai, kote Fakamagalo Tumau, kote Faka seai o Agasala..

-`Abdu'l-Bahá
-----------------------

26 Talosaga a ‘Abdu’l-Baha (#16097)

A Ia kote Matagofie-Katoatoa.

O toku Aliki, toku Tupu, toku Pule, mo toku Afioga-a-Tupu!  Au e kalaga atu kia Koe mo toku laulaufaiva, toku fatu, mo toku agaaga ola, kae fai atu penei:  Fakapei aka ate gatu o Tau tavini tenei kite gatu o Tou atafai, kote gatu o Tou feasoasoani seai se fakatamala iei, mote gatu tau o Tau puipuiiga.  Feasosoani kia ia ke faipatigia a Koe kae fakamaluga Ou uiga lei i vasia o Au tino, kae fakaaoga a tena laulaufaiva o taku taku a Tou gali mo tavaeega i so se lukuuga e fai o fakamanatu a Tou tafatasi mote mana.  A Koe, e tonu, kote Mafi, kote Maalosi, kote Matagofie-Katoatoa, kote Ola-fua-ia-Ia.

-`Abdu'l-Bahá
-----------------------

26 Talosaga a ‘Abdu’l-Baha (#16098)

O Toku Aliki alofa, O ko Koe kote manakoga o toku fatu mo toku agaaga ola!  Fakaeke atu ki luga i Ou taugasoa a Tou alofa-kaimalie, kae tuku atu kia latou a Tou alofa fakamagalo e fakanaagia.  Ke fai a Koe me se lago ki Au fagasele maalosi, pela foki ki se taugasoa, se faka-mafanafana, se sooko alofa kia latou kola e naunau kia Koe.  A olotou loto ko ula ite afi o Tou alofa, ka ko olotou agaaga ola ko kai ne te ulaaga ote fakatuanaki kia Koe.  E finafinau a latou, tokotasi mo katoa loa, o fakavavave atu kite tulaga o te alofa, kote mea ke mafai ne latou ite lotomalie o tuku ifo olotou ola.

O te Kilo Mao Atamai Faka-te-Lagi! Avatu kia latou Ou alofaaga, takitaki a latou kite auala tonu, feasoasoani alofa kia latou ke maua ne latou ate manumaalo faka-te-agaaga, kae fakaeke atu ki luga ia latou fakamanuiaaga mai ite lagi.  O te Aliki, feasoasoani a latou mai i Tou maumea mataefa mote alofa agalelei, kae fai a olotou mata fiafia pela me ne molii o takitakiiga i lukuuga e fakapitoa kite poto o Koe, mo fakailoga o te alofa mataefa faka-te-lagi i fakatasiiga kola e fakamatalagia Au kupu.  A Koe, e tonu, kote Alofa-Fakamagalo, kote Matalasi-Katoatoa, kote Tokotasi a Tena feasoasoani e manako gina ne tagata katoa.

-`Abdu'l-Bahá
-----------------------

26 Talosaga a ‘Abdu’l-Baha (#16099)

A Ia kote Matagofie-Katoatoa, kote Tafasili i te Malapulapu.

O te Kilo Mao Atamai Faka-te-Lagi, O te Aliki fakamagalo! E mafai pefea ne au o pese atu kite tulaga tau o Ou tavaeega io me o tapuaki kae faka-maluga faka katoatoa atu a Koe? A Tau fakamatalaaga ma i so se laulaufaiva e seai na kote se, ka ko Tau fakaasiiga o so se pene se molimau ite se ite taumafai o fai a te galuega faigata tenei.  A te laulaufaiva se mea faigaluega e aofia iei vaega kese kese; te leo mote faipati e seai kae ne uiga tapasala.  Tena la, e mafai pefea ne au o fakamanatu, mo se mea faigaluega e leo mai ite lalolagi, a tavaeega o Ia Tela e seai se tino e maluga atu ia Ia io mese fakatusa?  A te mea fua e mafai ne au o fai atu io me o salasala e fakatapula gia ne te iloa ote mafaufau faka tagata kae siomia ne tuakoi ote lalolagi o tino.  E mafai pefea a te mafaufau faka tagata o fanatu kite tumu loa i luga o te mana faka-te-lagi, kae e mafai foki pefea a te sipaita o manatu vaaivai o fenui atu a tena fale malepe vave o manatu fakasupasupa ki luga i manavaaga o koga piua kae fakamanagia?  E seai lele se mea e mafai ne au o fai na fua kote molimau ki toku seai se maalosi kae fakaasi tonu atu ki toku fakatamala.  A Koe, e tonu, a Ia Tela kote Aofia-Katoatoa, te Se-mafai-o-Okogia, a Ia Tela e se-fuafiiagina ite maluga mai i luga atu ote iloa o latou kola e fonu ite malamalama.

-`Abdu'l-Bahá
-----------------------

26 Talosaga a ‘Abdu’l-Baha (#16100)

O te Kilo Mao Atamai Faka-te-Lagi!  A Koe kote Fakamagalo Tutumau!  O ko Koe kote Atua ote Mafi Katoatoa, a Koe kote Alofa lei!  Talia kote tavini fakapelepele tenei a Koe ke nofo mai lalo ite malu o Tou matagofie, kae talia ko ia tenei vaaivai kae malalo ke mafai o tai lei kae olaola atu i loto i kogaa koga o Tou alofa fakamagalo.  Avatu kia ia ke inu mai ite ipu o Tou pilipili-mai, kae talia atu a ia ke nofo mai i lalo ote malu ote Lakau Ola Fakamanuiagia. Tuku atu ki luga ia ia ate faka-aloaloga ite oko atu ki Tou nofomai, kae fakaeke atu ki luga ia ia a te fiafia e se gata mai.  Mote alofa agalelei feasoasoani atu a kaaiga kola koi ola mai o te agaaga ola faka-aliki tenei ke tautali i alaaga vae ote olotou tamana fagasele, o fakaasi atu ona uiga mo ona faifaiiga i vasia o tino, ke tautali i Tou auala, salasala ki Tou fiafiaaga-lei, kae tavili a Ou tavaeega.  A Koe kote Atua Alofa, kote Aliki ote maukoloa.

-`Abdu'l-Bahá
-----------------------

26 Talosaga a ‘Abdu’l-Baha (#16101)

O Koe kote Atua e Se-Fakatusagia!  Matou ko Au tavini maulalo, a ko Koe kote Matagofie Katoatoa.  Matou ne tino agasala, a ko Koe kote Fakamagalo Tumau.  Matou ne tino pagota, mativa kae malalo, a ko Koe kote motou puipui malu mote motou feasoasoani.  Matou pela mene loo foiliki, ako Koe kote Aliki o afioga, fakakalauna-a-tupu ite lagi tafasili ite maluga.  Puipui mai matou, pela mese failoga alofa o Tou gali, kae sa taofigia mai ia matou a Tou atafai mote feasoasoani.  O te Aliki! Au tofotofooga e tonu i te mafa, ka ko Au tofooga e mafai o ofa ne latou a fakavae e faiite ki fiti. Tausi kae fakamaalosi mai matou; fakaolaola kae fakafiafia a motou loto.  Feasoasoani mote lei ke tavini atu matou, pela foki mo ‘Abdu’l-Bahá, i Tou Malumalu mana.

-`Abdu'l-Bahá
-----------------------

26 Talosaga a ‘Abdu’l-Baha (#16102)

A Ia kote Atua

O te Atua, toku Atua!  I se tulaga malalo kii loa mote loto finafinau, maulalo mote fakatuanaki, au e akai fakamolemole kia Koe mo toku laulaufaiva mo toku loto, mo toku agaaga mo toku agaaga ola, mo toku mafaufau mo toku mafaufau fakavae, ke talia mai a toe manakoga fakamatea i manakoga katoa, fakasino a toe uiga tafasili ite takutakua i uiga takuatakua katoa loa, kae fakaeke ate fakaaloalo mote lei katoatoa, alofaaga mote gali, ola lei mote toe-fakafouuga mote kaaiga tenei tela ko fakavave atu kite maluuga o Tou ata ite mafaaga o Tou vaveao malifalifa kae saala atu ki se lafiiga e saogalemu mo Tau olo mafi. E tonu, a agaaga ola konei e fakalogo ki Tau kalaga, fakapilipii atu ki Tou Malumalu, ke ka ulaula ite afi o Tou alofa, kae ko kave a latou nete manavaaga o Tou mana.  A latou e tumau ite galuega a Tau Fakatokaaga, maulalo i mua o Ou Mata, kae faka-aliki mai lalo ote malu o Tou ata.  A latou e lauiloa me ko tino kave o Tou igoa i vasia o Au tino kae takutaku a Koe i vasia o Au tavini.

O te Atua, toku Atua!  Fakamaluga a latou ne te matagofie favavau o Koe, kae fakaaloalo a latou i gali malifalifa o Tou Malo Faka-te-Lagi, kae feasoasoani a latou mo lukuuga o Ou alofaaga ite Aso takuatakua tenei.  O te Aliki, toku Atua!  Sisi aka ki luga ate fuka, talia mo latou a se tusaga tai lasi o Tau puipuiiga,  fakaokooko a olotou fakailoga ki tua atu, kae soloki aka ate malifalifa fiafia o latou, kote mea ke fai latou pela mese kilasi mote lamepa o Ou alofaaga mo tino fakasalalau atu a Tou alofa-kaimalie mo Ou maumea mataefa.

O te Aliki, toku Atua! Ke fai Koe mote taugasoa o latou i taimi e nofo aka loa latou faka-alofa taki toko tasi, kae i se taimi mutana ote olotou tigaina faka akoi atu latou ki Tou feasoasoani.  Togi atu kia latou a Tau Tusi kae fakaeke atu kia latou ate katoaaga o Au mea-alofa mo fakamanuiaaga.  A Koe i te tonuuga kote Mafi, kote Maalosi, kote Alofa Lotolei, kote Alofa Mataefa, kae e tonu, a Koe kote Alofa-Fakamagalo, kote Alofa Atafai

-`Abdu'l-Bahá
-----------------------

26 Talosaga a ‘Abdu’l-Baha (#16103)

O te Aliki e tafasili i te maumea lauefa, e fonu fonu i te alofa-kaimalie,
A Tena poto e taofi fakapelepele ne toku kano loto mo toku agaaga ola!

I te fakataeao, ate fesoasoani ki toku agaaga ola e seai aka foki na ko Koe;
A ia e iloa a toku fakamoemoeega maalosi e seai aka foki na ko Koe.


A te loto tela i se taimi toetoe ne fakailoa atu a Koe
E se sala ki se sinu aka vagana kote naunau mae kia Koe tokotasi.

E se maalosi ate loto tela e se manava fanoanoa mo Koe,
Kae e lei atu ate kivi ote mata tela e se tagi mo Koe!

I loto i ituala katoa o toku fanoanoa tafasili, O te Aliki ote mafi,
Toku fatu e masaua a Tou masausauaaga ki se mainaaga sulu-maina

Fai, auala mai i Tau akoiiga, manava mai a Tou agaaga ki loto ia au,
Kote mea tela e seki ai aka loa ke iai kite se gata mai.

Se mafaufau kite omotou lauiloa mote omotou taaua, 
O te Aliki o te maukoloa-mataefa, ka kote alofa-kaimalie e ligi ifo ne Koe

Ki luga i manu konei e pakia a olotou kapakau kae e tuai ate olotou eva
Mai i Tou alofa-fakamagalo ne fakaeke atu a olotou kapakau foou.

-`Abdu'l-Bahá
-----------------------

